Muqdisho:-Munaasabad si heer sare ah loosoo agaasimay oo ay ku qalin jebinayeen in kabadan 600 Arday oo iyagu ka qalin jebiyey kuliyadaha kala duwan ee Jaamacadda SIMAD ayaa maanta lagu qabtay xarunta Jaamacadaasi oo ku taala degmada Xamar Jajab ee gobolka Banaadir.
Munaasabadda ayaa waxaa kasoo qeybgalay maamulka sare ee Jaamacadda SIMAD, macalimiinta Jaamacadda,Waalidiinta ay Carruurtooda qalin jebiyeen,Ardayda qalin jebisay iyo marti sharaf kale.
C/raxmaan Maxamed Xuseen Gudoomiyaha Jaamacadda SIMAD oo ugu horeyn munaasabadda khudbad ka jeediyey ayaa tilmaamay in Ardayda maanta qalin jebisay ay tiradoodu gaareysay 650 Arday kuwaasi oo iyagu Afartii sano ee aynu kasoo gudubnay wax ka baranayey kuliyadaha kala duwan ee Jaamacadda SIMAD.
Gudoomiyaha Jaamacadda SIMAD Mudane C/raxmaan Maxamed Xuseen ayaa kula dardaarmay Ardayda maanta qalin jebisay in waxa ay barteen ay ugu adeegaan dadkooda,dalkooda iyo diintooda islamarkaana ay bulshada kale ee Soomaaliyeed aqoontooda gaarsiiyaan oo aysan ka qeyb qaadan bur burka iyo dib u dhaca Dalkooda.
Qaar ka mid ah Ardayda maanta qalin jebisay oo la hadlay Warbaahinta Qaranka ayaa iyagu tilmaamay iney aad ugu farax sanyihiin munaasabadda qalin jebinta ah ee loo sameeyey iyo iney maanta gurtaan miraha ay Afartii sano ee lasoo dhaafay usoo dhabar adeygeen.
Jaamacadda SIMAD ee magaalada Muqdisho ayaa ka mid ah Jaamacadaha u istaagay in Ardayda Soomaaliyeed ee iyagu ku nool daruufaha adag ay gudaha Dalkooda Hooyo ku bartaan ayadoo dufcadaha kala duwan ee ka qalin jebiyey Jaamacadda SIMAD iyo Jaamacadaha kale ee Dalka ka jira ay hada ka shaqeeyaan gudaha Dalka.
Xigasho, Radio Muqdisho